Con uns versos de Violeta Parra que charran de libertat, encetemos o programa y o mes.

En pasar l’1 de mayo con as tradicionals manifestacions obreras y l’exito d’o socalce de Radio Topo 101.8 FM, faciemos una breu cronica y mas que mas, agradeixer a la collas que i tanyon y toda a chent que se i paso, porque gracias a actividatz como ista ye posible l’autochestion d’ista radio.

Un poquet de l’actualidat d’a semana, por cojones y como si d’un paseo militar se tractase, se fico en o programa a visita de l’ilustre ministro Cañete y as anunciadas inversions tocants a o malfurrie de diners que suposa o Pacto de l’Augua.

Conoixebanos a Zarrakatralla Folk por a suya nominacion en os zaguers Premios de la Música aragonesa, pero nunca no los hebanos visto. Actuon o pasau viernes en Zaragoza adintro d’as Chornadas d’as Luengas d’Aragon, los i viyemos y ta conoixer-los una mica mas gritemos a Bolo, con qui charremos a tamas de bell problema con o soniu telefonico.

D’atra man, iste domingo 6 de mayo se celebra en Echo una nueva edicion de Vivindo’n cheso. Marta Marín nos presento as actividatz d’ista chornada, que iste anyo contara amas con baixada de navatas.

Mosiqueta variada entre tot o programa con collas como Bad Religion, Gena, Gen, Mikel Laboa u La Gossa Sorda; y ta rematar una canta traducida d’os asturians Desakato.

A semana venient mas, remera que dende fa bells dias @fendoorella ye tamien en Twitter y que #tufasfendoorella

Podcast: Play in new window | Download

En una semana de movilizacions estudiantils y prous cabos d’anyo, nusatros no nos n’ixublidemos d’un que marco a nuestra historia y prencipiemos o programa con unas parolas que remeraban o 25 d’abril.

Teniemos un Fendo Orella d’ixos que nos fan goi, charremos de muitas cosas pero, mas que mas, en y de luengas.

En o tocant a l’aragones, ista semana se son desembolicando as XIX Chornadas d’as Luengas d’Aragon en Zaragoza. En o bell meyo d’istas chornadas y antes que no bi ise a presentar y prochectar Cosetas d’adentro, charremos telefonicament con a suya escritora, Lola Gracia. L’exito y repercusion que ye tenendo iste curtometrache ye platero, ya yera estada o miercols en Uesca adintro d’as actividatz de Luenga de Fumo y antes en buena cosa de lugars.

Y de l’aragones pasamos a l’asturiano. Unatra conexion telefonica, ista vegada con un viello conoixiu d’o programa y miembro d’a Xunta pola Defensa de la Llingua Asturiana, que nos presento o XXIV Concierto pola Oficialidá y con qui charremos un poquet dilla de l’actualidat de l’asturiano.

Mosica de La Gosssa Sorda y Non Servium en un programa participativo, dinamico, natural y chandrio de vez!

Muitas convocatorias ta istos dias y, ista vegada sin canta traducida, despidiemos o programa convidando-tos a viyer-nos l’1 de Mayo en a manifestacion unitaria y dimpues, en rematar, en o socalce que una anyada mas organiza Radio Topo.

Podcast: Play in new window | Download